ثرثرات مُستشفياتية…‏

3

السلام عليكم, كيفكم أخباركم؟
إن شاءالله بخير !!

مثل كل مرة  سوالف مالها معنى و حلطمات تافهة بس اليوم عن المُستشفى.

عاد لما اروح المُستشفى يطلع بداخلي شخصيتين ” نور الي تسب ” و ” نور الي تحش “

×××

” نور الي تسب “ تطلع لم نطول أكثر من ساعة و نحنا ننتظر

يعني بدون مبالغه نطلع الملف 10 دقيق تجلسين قرابة الـ10 دقيق آخره تنتظري ينادون أسمك في غرفة العلامات الحيوية, بعدها تنتظري قرابة الـساعة عشان تدخلي عند الدكتورة.

مع العلم أنه المُستشفى فاضي في الوقت الي اروح فيه و الدكتورة ما عندها شيء

بس كذا تطويل على الفاضي و لم تدخلي للدكتورة ما تاخذ حتى نصف ساعة من العلاج .

2

في مكتب الدكتورة ننتظره ترجع من الادارة.

طبعاً أنا أروح مع أمي مواعيد و مراجعة للسكر صرت اكره المُستشفى و ما اروحه الا مع امي حتى لو أنا مريضة أنتظر موعد أمي عشان أروح  أتعالج لانه تباتين في المُستشفى و ما خلصتي .

×××

أما ” نور الي تحش “ تطلع و تحش على فلانة و علانة > من الفضاوة يابوي

ما عندي شيء غير أتمقل في الداخلة و الطالعة في المُمرضة الفلانية و الدكتورة العلانية

و لا من مزاية الجلسة تسمعين حش المُمرضات على بعض طبعاً هنا أنا أحط رجل على رجل و أسمع و أحش داخلين معهم

و تجيك مريضة يا الله تظن إنه المُستشفى ملك أبوه مو ملك الحكومة و تتأف و الخلق مو عاجبينه و تبي تدخل قبل جميع المرضى و كأنه بكيفها الشيء

و تجيك الثانية الي مو تاركة لون من علبة المكياج ما حطته في وجهها و المُشكلة أنها مريضة معها زكام و كحة و نزلة معوية  و متكشخه كانها رايحة عرس

و تجيك وحده تصج راسك من السوالف البايخه و تسولف بصوت عالي و كان المُستشفى مافيه أي مخلوق غيرها

و تجيك الي لابسه كعب عد هذي شيء اخر ما تعرف تمشي فيه و تمشي و تطقطق تخلي راسك كانه مسامير يضربونهم بمطرقة ><“

و اكثر موعد أكرهه هو موعد القلب كل 6 شهور موعد واحد

ولكن هذا الموعد الي كل 6 شهور يطلع من عيني ما اتوتر على شيء كثر ما اتوتر عشانه 😦

لما يجي يوم الموعد, نصحى من الفجر و نطلع من البيت من الساعة 6 الصباح و تعلقين في زحمة الشوارع

و لم توصلين المُستشفى تنزلين و تمشين في متاهات و طبعاً لابُد من النظرات الخاطفة من الناس تروحين تسجلين و تاخذين رقم و تجلسين في الاستراحة …

بعد زمن طويل من الأنتظار ما يُعادل الـ“الساعتين إلى ثلاث ساعات “ و لم ينادون رقمك و أسمك تطالع حولك تلقى الجميع في الاستراحة يطالع فيك بنظرات حُقد الكل يبي مكانك تطلع من استراحت النساء تلقى الجميع يطالع فيك ” رجال طبعاً “ و أنتِ زي البلهة لازم تسرعي لانه النظرات عليك يخلونك ترتبكين بالغصب تدخلين عند الدكتور ربع ساعة بالكثير ما تاخذي يعطونك وصفة للادوية لـ6 شهور قدام و يقولون لك كل شهر تعالي اصرفيه و انتهى الموضوع .

و لم يكون في الموعد ذيك الأشعة الي لم تسويها أمي يعطوها لسته بالممنوعات و منها ” ممنوع أقترام الحامل و المُرضع – ممنوع أقتراب الأطفال – الجلوس بجانبها مع ترك مسافة فاصلة بينكم “ طبعاً و هناك المزيد من القائمة الي ما اذكرها و هذا الوضع يستمر لمدة 24 ساعة ><“

1

طبعاً هذي في الاستراحة الخاصة بالاشعة ما يجلس فيها الا الاشخاص الي بيسوون اشعة و عائلتهم و تكون هدئه و بارده زي الثلج 😐

×××

أمي كانت قبل تروح أربعة مُستشفيات و الحين صار ثلاثة

كانت كل حاجة في مُستشفى القلب مُستشفايين و الضغط مُستشفى و السكر في مُستشفى .

الحين صار الضغط و القلب جميع و السكر بروحة .

لم كنت في المدرسة كنت أروح معها بس السكر لانه نروح الظهر لكن الحين بما انه عندي أجازة طويلة المدى أروح معها القلب و السكر 🙂

×××

طبعاً أكتسبت مهارات بروحتي المُستشفى مع أمي و تكلمت عنها في تويتر قبل فتره ..

‏-‏           اول مهارة لا تخلي اي شخص يتعدا حدوده معك و لا تخليهم يتجاوزونك و يحطون شخص غيرك ‏مكانك‎ ..‎

  • ثاني مهارة راح تتعامل مع عدة شخصيات في الكادر الطبي, و في كادر طبي مُستهتر بدرجة كبيرة لا تسمح لهم يأخرونك و اجبرهم على احترامك.
  • المهارة الثالثة اذا حسيت انك تاخرت اكثر من الوقت المطلوب و مافيه ازدحام في المستشفى استفسر عن الوضع و اذا لزم الامر تقدم شكوة ” فعلاً سويتها مرة و قدمة شكوة في صندوق الشكاوي على التأخير الغير ضروري “.
  • المهارة الرابعة اذا دخلت عند الدكتور اشرح له حالتك بدقه عشان يصرف لك الادوية بالتمام و اذا حسيت الدكتور غير كفؤ تقدر تغيره محد راح يقولك ليش و كذا راح يغيرونه فوراً لانه هذا من حقك كمريض و أيضاً أول ما يخلصون من أخذ علاماتك الحيوية تخبرهم بأسم الدكتور أو الدكتورة الي تبي تتعالج عندها و بيودون ملفك عندها غصب مو طيب .

×××

و بالآخير صحيح اتحلطم و اسب و اهذر لكن هذا كمان له مزاية

طبعاً الحسنة الوحيدة غير الاجر لان اروح مع امي انه انا اطلع و اروح للمستشفى مشي على الأقدام لانه بجنب البيت فاقدر في هذا الوقت اتامل الشوارع و السيارات و الناس و كل شيء, بالاضافة الى تعرضي للشمس و الاجواء النقية مما يساعد على تحسين نفسيتي 😌

الزبدة انها فلسفة العودة من المستشفى 😂😂😂

و عطونا سوالفكم الي تصير لكم غالباً في المُستشفى أو موقف صار لكم في المُستشفى و ما نسيتوه..

ملاحظة: جميع الصور من تصويري .

في أمان الله, أستودعكم الله الذي لا تضيع ودائعه.

 

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s